ទូរសព្ទ Droid 4 ដែលជាទូរសព្ទស៊េរីចុងក្រោយរបស់ Motorola ត្រូវបានប្រកាសឲ្យដឹងពីថ្ងៃចេញលក់ និងតម្លៃជាផ្លូវការហើយនាពេលនេះ។ ទូរសព្ទនេះ នឹងត្រូវដាក់លក់ចាប់ពីថ្ងៃសុក្រ ទី១០ ខែកុម្ភៈ ជាមួយនឹងតម្លៃ ១៩៩ដុល្លារ (កិច្ចសន្យាពីរឆ្នាំជាមួយនឹង Verizon)។
Verizon បានប្រកាសពីតម្លៃ និងថ្ងៃចេញលក់សម្រាប់ទូរសព្ទថ្មីបំផុតនេះ នៅក្នុងសេចក្ដីថ្លែងការណ៍របស់ខ្លួន។ ជាមួយគ្នានេះដែរ ក្រុមហ៊ុនក៏បានបញ្ជាក់ផងដែរថា Droid 4 គឺជាទូរសព្ទដែលមានរាងស្ដើងបំផុត ពោលគឺជាទូរសព្ទsmartphone 4G QWERTY ដែលមានកម្រាស់មិនដល់កន្លះអ៊ីញផង។
ក្រៅពីនេះ Droid 4 មាន dual-core processor ១,២gHZ, មានទំហំអេក្រង់ ៤អ៊ីញ, កាមេរ៉ាខាងក្រោយ ៨មេហ្កាភិចស៊ែល និងកាមេរ៉ាខាងមុខ ១,៣មេហ្កាភិចស៊ែលផងដែរ។ ទូរសព្ទនេះ បានដំណើរការដោយ Android 2.3.5 "Gingerbread" ( Motorola នឹងធ្វើការ upgrate ទូរសព្ទរបស់ខ្លួន ទៅជា Ice Cream Sandwich ឲ្យបានកាន់តែច្រើន តាមដែលអាចធ្វើទៅបាន)។ក្រោយពីចេញលក់ នៅថ្ងៃសុក្រខាងមុខនេះ Droid 4 នឹងត្រូវចូលរួមជាមួយនឹងទូរសព្ទស៊េរីខ្ពស់ៗដទៃទៀតរបស់ Motorola។ ការធ្វើបច្ចុប្បន្នភាពលើទូរសព្ទ Droid RAZR ពោលគឺទូរសព្ទ Droid RAZR Maxx ក៏កំពុងតែទទួលការចាប់អារម្មណ៍ខ្ពស់ផងដែរ ចាប់តាំងពីដាក់បង្ហាញក្នុងពិពណ៌ Consumer Electronics Show នៅឡូស អ៊ែនជើលែសកាលពីខែមករាកន្លងទៅ ជាពិសេសជាមួយនឹងថាមពលថ្មដែលកាន់បានយូររបស់វា។
