ក្រុមហ៊ុន Nokia Siemens Networks (Nokia បូកជាមួយ Siemens) ដែលជាក្រុមហ៊ុនផលិតសម្ភារៈទូរសព្ទដៃដ៏ធំជាងគេបំផុតទីពីរលើពិភព លោក មិនទាន់បានងើបរួចពីភាពដុនដាបនោះទេ ដែលពេលនេះបានប្រកាសពីផែនការកាត់បន្ថយបុគ្គលិកក្នុងចំនួនដ៏ច្រើន ទៀតហើយ។
Nokia Siemens បានបញ្ជាក់ឲ្យដឹងថា នៅប្រទេសអាល្លឺម៉ង់នឹងមានការកាត់បន្ថយ ២៩០០នាក់ ខណៈដែលនៅហ្វាំងឡង់ មាន ១២០០នាក់ ដែលជាផ្នែកមួយនៃកម្មវិធីកែទម្រង់ដ៏ធំ។ ការកាត់បន្ថយបុគ្គលិកលើកនេះទៀត ក៏ប្រហែលជាមិនទាន់ចប់នៅឡើយដែរសម្រាប់ក្រុមហ៊ុននេះ ព្រោះគោលបំណងរបស់ក្រុមហ៊ុន គឺនឹងកាត់បន្ថយឲ្យបាន ១ភាគ៤នៃបុគ្គលិកសរុបរបស់ក្រុមហ៊ុន ដើម្បីកាត់បន្ថយចំណាយឲ្យបាន ១ពាន់លានអឺរ៉ូ (១,៣១ពាន់លានដុល្លារ) ក្នុងមួយឆ្នាំ។
គួរ បញ្ជាក់ផងដែរថា ក្រុមហ៊ុន Nokia Siemens បានប្រឹងប្រែងតស៊ូរកប្រាក់ចំណេញតាំងតែពីពេលបង្កើតនាឆ្នាំ ២០០៧ មកម្លេះ។ ក្រុមហ៊ុននេះកើតឡើង ដោយសារតែការរួមគ្នារវាង Nokia និង Siemens ដើម្បីប្រជែងនឹងក្រុមហ៊ុនដ៏ធំជាងគេក្នុងការផលិតសម្ភារៈទូរសព្ទ ដៃ គឺ Ericsson។ ប៉ុន្ដែចាប់តាំងពីពេលបង្កើតមក ក្រុមហ៊ុននេះបានជួបប្រទះនូវព្យុះភ្លៀងជាច្រើន ដូចជាការប្រកួតប្រជែងផ្នែកតម្លៃពីគូប្រកួតប្រជែង រួមជាមួយនឹងបញ្ហាវិបត្តសេដ្ឋកិច្ចសាកលលោកថែមទៀត។
