យោងតាមសារព័ត៌មាន Xinhua របស់ចិន បានឲ្យដឹងថា ក្រុមហ៊ុន Apple កំពុងតែធ្វើការជាមួយនឹងក្រុមហ៊ុនផ្គត់ផ្គង់នៅប្រទេសអាស៊ី ដើម្បីសាកល្បងនូវកុំព្យូទ័រ tablet ថ្មី ដែលមានទំហំអេក្រង់តូចជាង iPad ពោលគឺត្រឹម ៨អ៊ីញប៉ុណ្ណោះ។
Wall Street Journal ក៏បានបញ្ជាក់ផងដែរថា មន្រ្ដីមួយចំនួននៅក្រុមហ៊ុនផ្គត់ផ្គង់ដល់ Apple ដែលសុំមិនបញ្ចេញឈ្មោះ បាននិយាយថា ក្រុមហ៊ុនកំពុងតែដាក់បង្ហាញនូវការឆ្នៃម៉ូដ សម្រាប់ tablet ថ្មី ទំហំអេក្រង់ ៨អ៊ីញនេះ។
ប្រិយមិត្តដែលប្រើប្រាស់ iPad ប្រាកដជាដឹងហើយថាមានទំហំអេក្រង់ ៩,៧អ៊ីញ ដូច្នេះការចេញតូចជាងមុន អាចជាយុទ្ធសាស្រ្ដថ្មីមួយរបស់ Apple ក្នុងការប្រជែងជាមួយ tablet តូចៗរបស់ Samsung និងក្រុមហ៊ុនដទៃទៀត ដូចជា Amazon ជាដើម ដើម្បីបន្ថែមភាពនាំមុខ ឬថែរក្សាដំណែងលេខមួយរបស់ខ្លួនក្នុងទីផ្សារ tablet។បើមើលលើទិន្នន័យរបស់ក្រុមហ៊ុនស្រាវជ្រាវទីផ្សា IDC បានបង្ហាញថា Apple មានចំណែកដល់ទៅ ៦១,៥ភាគរយ ក្នុងទីផ្សារ tablet សាកលលោក ក្នុងត្រីមាសទីបីនៃឆ្នាំ ២០១១។ មិនទាន់មានការបញ្ចេញឲ្យដឹងនូវទិន្នន័យថ្មីនោះទេ ប៉ុន្ដែបើធៀបជាមួយនឹងត្រីមាសទីពីរ គឺចំណែកទីផ្សាររបស់ Apple បានថយចុះ ពោលគឺថយពី ៦៨,៣ភាគរយ មក ៦១,៥ភាគរយ។
ព័ត៌មាននៃការធ្វើតេសន៍ tablet ទំហំតូចជាងមុននេះ គឺបានលេចឡើង នៅពេលដែលមានពាក្យចចាមអារាមជាច្រើន និយាយពីការចេញ iPad ថ្មីនៅខែមីនាខាងមុខ ដោយ iPad ថ្មីនោះ នឹងមានទំហំអេក្រង់ប្រហាក់ប្រហែលនឹង iPad 2 ដែរ។
