ប្រភពពីខាងរោងចក្រមួយនៅអឺរ៉ុបខាងកើត ដែលជារោងចក្រផលិតឧបករណ៍បច្ចេកវិទ្យាឲ្យក្រុមហ៊ុន Google, Apple និង Amazon បានបង្ហាញឲ្យដឹងថា Google កំពុងដំណើរការផលិតនូវ tablet ដែលមានទំហំតូចដូច Kindle Fire របស់ Amazon ពោលគឺមានទំហំតែ៧អ៊ីញប៉ុណ្ណោះ។ ទំហំនេះ គឺតូចណាស់ បើធៀបជាមួយនឹង iPad របស់ Apple ដែលមានទំហំ ៩,៧អ៊ីញ។
ប្រភពដដែលនេះ បានបង្ហាញជំនឿចិត្តថា Google នឹងចេញ tablet នេះនៅខែមីនា ឬមេសា ខាងមុខ ដោយដំណើរការដោយ Android។ អ្វីដែលមិនគួរឲ្យជឿនោះ គឺថា tablet ថ្មីនេះ នឹងមានតម្លៃថោក ត្រឹមតែជិត២០០ដុល្លារប៉ុណ្ណោះ។ តម្លៃប៉ុណ្ណោះ គឺដូចនឹងតម្លៃរបស់ Kindle Fire របស់ Amazon ដែរ។
តាមរយៈតម្លៃដ៏ថោកនេះ អាចឲ្យគេដឹងបានថា Google កំពុងផ្ដោតសំខាន់ទៅលើបរិមាណ ជាជាងប្រាក់ចំណេញ ដូចដែលអ្វីដែល Amazon បានជោគជ័យនាពេលកន្លងមក។ Tablet នេះ នឹងក្លាយជាឧបករណ៍កំសាន្ដ មិនមែនជាឧបករណ៍សម្រាប់ជំនួស laptop ដូចជា iPad និង Galaxy Tab (១០,១អ៊ីញ) នោះទេ។
សារព័ត៌មានបច្ចេកវិទ្យា Digitimes ក៏បានសរសេរដែរថា Google នឹងមិនប្រកួតប្រជែងជាមួយ Apple នោះទេ ប៉ុន្ដែចាត់ទុក Amazon ជាដៃគូប្រកួតប្រជែងចម្បងជាងគេ (តម្លៃថោក និងទំហំតូចដូចគ្នា)។
យ៉ាងណាមិញ ក្រុមហ៊ុន Google ប្រចាំប្រទេសតៃវ៉ាន់ បានសរសេរតបចំពោះពាក្យចចាមអារាមនេះថា ខ្លួនមិនដែលបានលឺពីផែនការចេញ tablet របស់ Google នោះទេ។
ក្រៅពីដំណឹងស្ដីពីការចេញ tablet ដោយខ្លួនឯងរបស់ Google នេះ ក៏មានព័ត៌មានជាច្រើននិយាយពីការចេញ iPad 3 ផងដែរ ដែលខ្មែរសារិកានឹងចេញផ្សាយនាពេលក្រោយទៀត។
