នៅល្ងាចថ្ងៃច័ន្ធ មាននារីមាឌធំ និងកាចអស្ចារ្យមា្នក់ ក្រោយពីចម្អិនអាហារ និងរៀបចំអាហាររួចបានមើលម៉ោង ឃើញថា ម៉ោង៧យប់ហើយ ប្តីដ៏សំគមរបស់គាត់មិនទាន់មកដល់ផ្ទះ ដើម្បីហូបបាយជុំគ្រួសារឡើយ។ កាន់តែមើលម៉ោងកាន់តែក្តៅចិត្តដូចនេះនាងដែលជាប្រពន្ធមាឌធំរូបនេះបាន ប្រើកូនប្រុស " អាចយរត់ទៅថ្នល់យកទូរសព្ទសាធារណៈតេហៅឪឯងមកហូបបាយលឿន ម៉ាក់ចាំផ្លូវ"។
ក្រោយពីទៅបាត់មួយសន្ទុះកូនប្រុសរត់ត្រហេបត្រហបមកប្រាប់ម៉ែ " ម៉ែៗ កូនតេទៅ៥-៦ដង តែមាន ស្រីម្នាក់ឆ្លើយរហូត..." កូននិយាយមិនទាន់ចប់ ម្តាយគំហក " បានហើយ! ទៅមើលទូរទស្សន៍ទៅ "។ ប្រមាណជា១៥នាទី ក្រោយមកប្តីសំគមមកដល់ទើបចុះផុតពីឡានភ្លាម គាត់ក៏ត្រូវប្រពន្ធដាល់តប់ផាំងៗ រកគេចមិនទាន់ ដោយ មិនបានត្រៀមមុន ណាមួយមាឌតូច បុរសនោះក៏ប្រះខ្លួនលើទីធ្លាស្រែកដូចក្មេងហៅគេឯងជួយ។
ញាតិជិតខាងឈូរឆមកជួយ ស្ត្រីជាប្រពន្ធខឹងណាស់ ស្រែកដាក់កូនថា " អាក្អូន ប្រាប់អ៊ំៗទៅ មីស្រីនោះ ថាម៉េចខ្លះ! " កូនតប " ម៉ែៗ ស្រីនោះនិយាយថា លេខដែលលោកអ្នកហៅមិនអាចទទួលការហៅចូលបានទេ "។
