សប្ដាហ៍នេះ ពិតជាប្លែក និងពិតជាអស្ចារ្យសម្រាប់រឿងថ្មីៗ ដោយសារតែរឿងចាស់ៗ ដែលរួមទាំងម្ចាស់ដំណែងលេខ១កាលពីសប្ដាហ៍មុន ពោលគឺរឿង Chronicle សុទ្ធតែស្ថិតនៅក្រោមរឿងដែលទើបចេញសប្ដាហ៍នេះទាំងអស់។
ជាក់ស្ដែងខ្សែភាពយន្ត ដែលមានចំណងជើងថា The Vow បានឈរនៅលំដាប់កំពូលគេក្នុងតារាង box office ក្រោយពីអាចរកទឹកប្រាក់បានរហូតដល់ ១៥,៣៥លានដុល្លារក្នុងថ្ងៃសុក្រ ដែលធ្វើឲ្យទឹកប្រាក់សរុបប្រចាំសប្ដាហ៍នៃរឿងបែបរ៉ូមែនទិចមួយនេះ កើនដល់ ៤០លានដុល្លារ។
ដូចបញ្ជាក់ខាងលើរួចមកហើយ រឿងថ្មីទាំង៤ សុទ្ធតែនៅផ្នែកខាងលើគេ ដូច្នេះចំណាត់ថ្នាក់លេខពីរក៏ជារឿងទើបបង្ហាញមុខដែរ នោះគឺរឿង Safe House របស់ក្រុមហ៊ុន Universal។ Safe House បានចាញ់ The Vow តែបន្ដិចប៉ុណ្ណោះ បើគិតលើចំនួនទឹកប្រាក់ដែលរកបានពីការលក់សំបុត្រ។ ការរកបាន ១៣,៨លានដុល្លារនៅថ្ងៃសុក្រ ធ្វើឲ្យចំនួនសរុបប្រចាំសប្ដាហ៍ដំបូង មានចំនួន ៣៩លានដុល្លារ ចាញ់ The Vow តែមួយលានដុល្លារប៉ុណ្ណោះ។ចំណាត់ថ្នាក់លេខ៣ រៀងដាច់ឆ្ងាយពីរឿងទាំងពីរខាងលើបន្ដិច ពោលគឺទទួលបាន ២៤,៥លានដុល្លារ។ ម្ចាស់ដំណែងលេខបីនេះ គឺជារឿងរបស់ក្រុមហ៊ុន Fox ដែលមានចំណងជើងថា Star Wars: Episode I - The Phantom Menace 3D ។
រឿងថ្មីចុងក្រោយ ដែលស្ថិតនៅចំណាត់ថ្នាក់លេខបួន គឺជារឿងរបស់ Warner Bros ដែលមានចំណងជើងថា Journey 2 - The Mysterious Island។ ខ្សែភាពយន្តនេះ ក៏ហាក់ដូចជាតាមយ៉ាងប្រកិតជាមួយនឹងចំណាត់ថ្នាក់លេខបីផងដែរ ពោលគឺអាចរកបាន ២៣,៥លានដុល្លារ ដែលអាចសង្ឃឹមថា ចំណាត់ថ្នាក់នឹងមានការផ្លាស់ប្ដូរនៅសប្ដាហ៍ក្រោយ។
ងាកមកមើលរឿងលេខមួយកាលពីសប្ដាហ៍មុនវិញ គឺរឿង Chronicle បានធ្លាក់ដល់លេខ៥ ដោយសារតែរឿងថ្មីៗទាំងបួនខ្លាំងពេក។ ខ្សែភាពយន្តនេះ អាចរកបានតែ ១១,៥លានដុល្លារប៉ុណ្ណោះ ពោលគឺថយចុះដល់ទៅ ៤៨ភាគរយ បើធៀបនឹងសប្ដាហ៍មុន។
