តារាចម្រៀងដ៏ល្បីរបស់អង់គ្លេស គឺនាង Adele បានឈរលើគេនៅកំពូលតារាងចំណាត់ថ្នាក់បទចម្រៀង Billboard ជាមួយនឹងអាល់ប៊ុមកំពុងពេញនិយមរបស់នាង គឺអាល់ប៊ុមដែលមានឈ្មោះថា "21" កាលពីថ្ងៃពុធម្សិលម៉ិញ។ អាល់ប៊ុមរបស់នាងមួយនេះ បានទទួលបានចំណាត់ថ្នាក់លេខមួយ ទោះបីជាមានអាល់ប៊ុមថ្មីៗចំនួន ៧ផ្សេងទៀត ចូលលុកលុយទីផ្សារដើម្បីស្វែងរកលេខមួយដែរក៏ដោយ។
អាល់ប៊ុម "21" នេះ បានលក់ដាច់អស់ ៦លានបន្ទះ នៅសហរដ្ឋអាមេរិក ចាប់តាំងពីថ្ងៃចេញលក់ កាលពីខែកុម្ភៈ ឆ្នាំ២០១១ ទទួលបានចំណាត់ថ្នាក់កំពូលនៅ Billboard រយៈពេល១៨សប្ដាហ៍។
គួរបញ្ជាក់ផងដែរថា តារាចម្រៀង Adele បានចាប់ផ្ដើមអាជីពចម្រៀងសារជាថ្មីក្រោយវះកាត់កាលពីខែវិច្ឆិកា ដែលពេលនេះនាងបាននិយាយអះអាងពីការតាំងចិត្តក្នុងការដណ្ដើមពានរង្វាន់ Grammy Awards នៅ Los Angeles នាថ្ងៃទី ១២ ខែកុម្ភៈ។ចំណាត់ថ្នាក់លេខពីរ បានទៅលើអាល់ប៊ុម Emotional Traffic របស់តារាចម្រៀងបែបជនបទ Tim McGraw ខណៈដែលអាល់ប៊ុមថ្មីរបស់ក្រុមចម្រៀងរ៉ុក Lamb of God បានទទួលចំណាត់ថ្នាក់បន្ទាប់។
ចំណែកឯបទចម្រៀង Stronger របស់តារាចម្រៀង Kelly Clarkson ដ៏ល្បីនោះ ក៏បានទទួលចំណាត់ថ្នាក់កំពូលនៅតារាង Digital Songs Chart ផងដែរ ដែលតាមពីក្រោយដោយបទចម្រៀងមួយបទទៀតរបស់ Adele គឺបទ Set Fire to the Rain ស្របពេលដែល Turn Me On របស់ David Guetta ជាមួយនឹង Nicki Minaj បានធ្លាក់ពីលេខមួយមកដល់លេខបីក្នុងសប្ដាហ៍នេះ។
ប្រភព៖ Reuters
