ខ្សែភាពយន្តថ្មីស្រឡាងដែលមានចំណងជើងថា The Grey បានចាប់ផ្ដើមយ៉ាងល្អបំផុតនៅសប្ដាហ៍ដំបូងក្នុងរោងកុននានានៅសហរដ្ឋអាមេរិក និងកាណាដា។ ខ្សែភាពយន្តនេះបានដណ្ដើមយកដំណែងកំពូលគេនៅ Box office ពីខ្សែភាពយន្តចាស់ៗទាំងឡាយ ក្រោយពីរកបានដល់ទៅ ៦,៤លានដុល្លារកាលពីថ្ងៃសុក្រ។ គិតជារួមទៅ ចំណូលសរុបប្រចាំសប្ដាហ៍នេះ គឺ The Grey រកបាន ១៨,៥លានដុល្លារ ស្ថិតនៅលើគេក្នុងតារាងចំណាត់ថ្នាក់ខ្សែភាពយន្ត ខណៈដែលចំណាត់ថ្នាក់លេខពីរហាក់ដូចជាដាច់ឆ្ងាយពីខ្លួនយ៉ាងខ្លាំង។
Underworld Awakening ដែលធ្វើបានយ៉ាងល្អកាលពីសប្ដាយ៍មុន បានធ្លាក់ចុះប្រាក់ចំណូលដល់ទៅ ៥៣ភាគរយក្នុងសប្ដាហ៍នេះ ពោលគឺរកបានតែ ១១,៨លានដុល្លារប៉ុណ្ណោះសម្រាប់សប្ដាហ៍ទីពីររបស់ខ្លួននេះ។
ចំណែកឯចំណាត់ថ្នាក់លេខបីវិញ ក៏ជារឿងថ្មីដូច The Grey ដែរ គឺរឿង One for the Money របស់ Liongate។ ជាមួយនឹងប្រាក់ចំណូល ៤,១លានដុល្លារកាលពីថ្ងៃសុក្រ ខ្សែភាពយន្តដែលសម្ដែងដោយតារាល្បី Katherine Heigl នេះ អាចរកចំណូលសរុបប្រចាំសប្ដាហ៍បាន ១១,៥ មិនសូវល្អដូចការរំពឹងទុកនោះទេ។ក្នុងសប្ដាហ៍នេះ គេសង្កេតឃើញរឿងថ្មីចំនួនបី ដូច្នេះនៅមានមួយរឿងទៀតដែលបានបង្ហាញខ្លួនក្នុងចំណាត់ថ្នាក់កំពូលទាំង១០ដែរ គឺរឿង Man on a Ledge។ ទោះបីជាទើបនឹងបញ្ចាំងសប្ដាហ៍ដំបូងក៏ដោយ ក៏រឿងថ្មីមួយនេះមិនបានទទួលការចាប់អារម្មណ៍ច្រើននោះទេ ដោយអាចស្ថិតនៅត្រឹមចំណាត់ថ្នាក់លេខ៦ប៉ុណ្ណោះ ជាមួយនឹងប្រាក់ចំណូលពីការលក់សំបុត្របាន ៧,៣លានដុល្លារ។
ក្រៅពីនេះ រឿងចាស់ចំនួនពីរ ក៏នៅតែបង្ហាញខ្លួនក្នុងចំណាត់ថ្នាក់កំពូលទាំង៥ផងដែរ ដោយរឿង Red Tails ទទួលចំណាត់ថ្នាក់លេខបួនក្នុងសប្ដាហ៍ទីពីររបស់ខ្លួន ដោយរកបាន ១០,៥លានដុល្លារ ខណៈដែលរឿង Extremely Loud and Incredibly Close នៅតែបង្ហាញមុខដដែលក្នុងសប្ដាហ៍ទី៦នៃការបញ្ចាំង ជាមួយនឹងទឹកប្រាក់៧,៥លានដុល្លារ សមល្មមស្ថិតនៅចំណាត់ថ្នាក់ទី៥។
ក្រៅពីរឿងទាំង៦ខាងលើ រឿងបួនផ្សេងទៀត ដែលស្ថិតក្នុងចំណាត់ថ្នាក់ពីលេខ៧ ដល់លេខ១០ សុទ្ធសឹងជារឿងចាស់ ដែលមានដូចជា Contraband, The Descendants, Beauty and the Beast 3D, និងរឿង Haywire។
