ខ្សែភាពយន្ត Mission: Impossible - Ghost Protocol បានឡើងមកកាន់កាប់ box office នាថ្ងៃអាទិត្យម្សិលម៉ិញនេះ ដោយបានឈរនៅលេខមួយ ទោះបីជាមានរឿងថ្មីៗជាច្រើនចេញក្នុងថ្ងៃ Christmas ក៏ដោយ។
ខ្សែភាពយន្តថ្មីបំផុតសម្រាប់តារាសម្ដែង Tom Cruise នេះ បានរកប្រាក់ចំណូលបាន ២៦,៥លានដុល្លារនៅក្នុងសហរដ្ឋអាមេរិក និងកាណាដា ក្នុងរយៈពេលបីថ្ងៃចុងសប្ដាហ៍។
គួរបញ្ជាក់ផងដែរថា នេះគឺជាខ្សែរឿងទីបួនហើយ ក្នុងស៊េរីរឿង Mission: Impposible។ នៅក្នុងការផលិតរឿងនេះមួយ Paramount រួមទាំង Skydance Productions បានចំណាយប្រាក់ចំនួន ១៤៥លានដុល្លារ។
ខ្សែភាពយន្តដែលឈរនៅលេខពីរ គឺរឿង "Sherlock Holmes: Game of Shadows" ដែលជារឿងតពីរឿង Sherlock Holmes កាលពីឆ្នាំ ២០០៩។ ប្រាក់ចំណូលប្រចាំសប្ដាហ៍របស់រឿងនេះ គឺ ១៧,៨លានដុល្លារ ថយចុះ៥៥ភាគរយ បើធៀបជាមួយសប្ដាហ៍មុន។
ចំណែកឯខ្សែភាពយន្តបែប 3D ដែលមានចំណងជើងថា "Alvin and the Chipmunks: Chipwrecked" ក៏មានការធ្លាក់ចុះផងដែរ ដោយទទួលបានលេខបី ខណៈសប្ដាហ៍មុនឈរនៅចំណាត់ថ្នាក់លេខពីរនោះ។ ខ្សែភាពយន្តរបស់ Fox ដែលនិយាយពីសត្វកំប្រុកចេះច្រៀងរាំយ៉ាងគួរឲ្យទាក់ទាញនេះ អាចលក់សំបុត្របាន ១៣,៣លានដុល្លារក្នុងសប្ដាហ៍នេះ។
ចំណាត់ថ្នាក់លេខ៤ គឺជារឿង The Girl With the Dragon Tattoo របស់ Sony ដោយអាចរកប្រាក់ចំណូលបាន ១៣លានដុល្លារ។ ជាមួយគ្នានេះដែរ ខ្សែភាពយន្ត The Anvantures of Tintin អាចរកប្រាក់ពីការលក់សំបុត្របាន ៩,១លានដុល្លារ ល្មមឈរនៅត្រឹមចំណាត់ថ្នាក់លេខ៥។
ចំណាត់ថ្នាក់ពីលេខ៦ ដល់លេខ១០ រួមមាន៖ We Bought a Zoo (៧,៨លានដុល្លារ), New Year's Eve (៣លានដុល្លារ), Arthur Christmas (២,៧លានដុល្លារ), Hugo (២លានដុល្លារ) និង The Muppets (២លានដុល្លារ)។
ប្រភព៖ Xinua, Reuters, Box office
