Twilight ខ្លាំង គឺនៅតែខ្លាំង ពោលគឺអាចរក្សាដំណែងលេខមួយនៅ box office បានដល់ទៅបីសប្ដាហ៍ជាប់គ្នា ដោយកម្រមានរឿងណាអាចធ្វើបានណាស់។ វគ្គថ្មីបំផុតរបស់ Twilight គឺរឿង "The Twilight Saga: Breaking Dawn: Part 1" អាចរកប្រាក់ចំណូលពីការលក់សំបុត្របាន ១៦,៩លានដុល្លារនៅអាមេរិក និងកាណដា និងរកបាន ៤០,២លានដុល្លារនៅទូទាំងពិភពលោក ក្នុងសប្ដាហ៍ទីបីរបស់ខ្លួននេះ។
ជាសរុបរួម ក្នុងការបញ្ចាំងបីសប្ដាហ៍នេះ Breaking Dawn អាចរកបានដល់ទៅ ៥៨៨,៣លានដុល្លារហើយ ដែលនេះនៅមិនទាន់ចប់នៅឡើយទេ។
ការទទួលជ័យជំនះបីសប្ដាហ៍ជាប់ៗគ្នានេះ ត្រូវបានគេមើលឃើញថា ដោយសាររឿងនេះបានចេញបញ្ចាំងមុនពិធីបុណ្យ Thanksgiving ដែលជាពិធីបុណ្យធំគ្រាន់បើមួយនោះ។ មួយវិញទៀត ខ្សែភាពយន្ត Twilight នេះ ធ្លាប់បានទទួលភាពល្បីល្បាញច្រើនដងរួចមកហើយ ដោយសារតែវាជារឿងដែលផលិតឡើង ដោយយោងទៅតាមសៀវភៅប្រលោមលោកដែលលក់ដាច់បំផុតរបស់លោក Stephenie Meyer។ទោះជាយ៉ាងណាក្ដី ដោយសារតែមិនសូវមានរឿងចេញថ្មីនៅសប្ដាហ៍នេះ បានធ្វើឲ្យប្រាក់ចំណូលជារួមក្នុង box office បានធ្លាក់ចុះយ៉ាងច្រើនផងដែរ បើធៀបជាមួយប្រាក់ចំណូលចុងសប្ដាហ៍ដូចគ្នានេះកាលពីឆ្នាំមុន។
ក្រៅតែពីរឿងស្នេហាត្រីកោណ "The Twilight Saga: Breaking Dawn: Part 1" នេះ ខ្សែភាពយន្តដទៃទៀត ដែលជាប់ចំណាត់បន្ទាប់ គឺសុទ្ធសឹងជារឿងជាលក្ខណៈគ្រួសារ ដែលមានដូចជា រឿង The Muppets ដែលឈរនៅលេខពីរ និងរកបាន ១១,២លានដុល្លារជាដើម។
