វគ្គថ្មីនៃខ្សែភាពយន្តដ៏ល្បី The Twilight គឺរឿង The Twilight Saga: Breaking Dawn - Part I នៅតែបង្ហាញភាពខ្លាំងរបស់ខ្លួនដដែលនៅសប្ដាហ៍ទីពីរនៃការដាក់បញ្ចាំង ដោយអាចរក្សាដំណែងលេខមួយដាច់គេដដែល។
កាលពីសប្ដាហ៍ដំបូង ខ្សែភាពយន្តនេះ បានវ៉ាដាច់គូប្រកួតប្រជែងដទៃទៀតយ៉ាងឆ្ងាយ ហើយសប្ដាហ៍នេះក៏មិនសូវជាខុសគ្នាប៉ុន្មាននោះទេ ពោលគឺគ្រាន់តែថ្ងៃសុក្រមួយថ្ងៃ រឿងនេះអាចរកចំណូលបានដល់ទៅ ១៦,៩លានដុល្លារ ដែលនេះគិតតែនៅសហរដ្ឋអាមេរិក និងកាណាដាប៉ុណ្ណោះ។ ប្រាក់ចំណូលប៉ាន់ស្មានប្រចាំសប្ដាហ៍នេះ គឺ ៤០លានដុល្លារ ដែលល្មមឲ្យរឿងនេះឈរនៅលំដាប់លើរឿងថ្មីៗដទៃទៀត។
រឿងថ្មីដែលខ្លាំងជាងគេក្នុងសប្ដាហ៍នេះ គឺរឿង The Muppets ដែលបានស្ថិតនៅលំដាប់ទីពីរបន្ទាប់ពី The Twilight Saga: Breaking Dawn - Part I ប៉ុន្ដែបើធៀបជាមួយរឿងថ្មីដូចគ្នា គឺរឿងនេះស្ថិតនៅលេខមួយ។ ខ្សែភាពយន្តរបស់ Disney មួយនេះ បានចាប់ផ្ដើមមិនសូវល្អប៉ុន្មាននោះទេកាលពីថ្ងៃសុក្រ ដោយអាចរកបានតែ ១២,២លានដុល្លារ។ បើគិតប្រចាំសប្ដាហ៍វិញ ប្រាក់ចំណូលដែលគេរំពឹងទុក គឺ៣០,៥លានដុល្លារ។ចំណែកឯរឿងថ្មីមួយទៀត ដែលល្អគ្រាន់បើដែរនោះ គឺរឿង Arthur Christmas ដែលបានឈរនៅលំដាប់ទីបួន ជាមួយនឹងប្រាក់ចំណូលប៉ាន់ស្មានប្រចាំសប្ដាហ៍ចំនួន ១១,៥លានដុល្លារ ខណៈដែលរឿងដែលបង្ហាញមុខតាំងពីសប្ដាហ៍មុន គឺរឿង Happy Feet Two បានស្ថិតនៅចំណាត់ថ្នាក់ទី៣ ដោយអាចរកបាន ១៣លានដុល្លារ។
រឿងថ្មីចុងក្រោយប្រចាំសប្ដាហ៍នេះ គឺរឿង Hugo ដោយបានយកឈ្នះរឿងចាស់ៗចំនួន៥ផងដែរក្នុងលំដាប់កំពូលទាំង១០។ ជាមួយនឹងប្រាក់ចំណូលពីការលក់សំបុត្របាន ១១លានដុល្លារ គឺល្មមគ្រប់គ្រាន់ឲ្យរឿងរបស់ Paramount នេះ ឈរនៅលេខរៀងទី៥ ក្នុង box office។
ខ្សែភាពយន្ត៥ផ្សេងទៀត គឺសុទ្ធសឹងជារឿងដែលធ្លាប់បង្ហាញខ្លួននៅសប្ដាហ៍កន្លងមកហើយ ដែលមានដូចជា Jack and Jill, Immortals, Puss in Boots, Tower Heist និងរឿង J. Edgar។
