ខ្សែភាពយន្តស៊េរីថ្មីមួយទៀតនៃរឿង Twilight បានបើកឆាកក្នុងសប្ដាហ៍ដំបូងរបស់ខ្លួនជាមួយនឹងទឹកប្រាក់ពីការលក់សំបុត្រនៅទូទាំងពិភពលោកបានដល់ទៅជាង ២៨៣,៥លានដុល្លារ។ នេះគឺជាទទួលបានប្រជាប្រិយភាពយ៉ាងសម្បើមពីសំណាក់អ្នកគាំទ្ររឿងដ៏ល្បីមួយនេះ។
"The Twilight Saga: Breaking Dawn: Part 1" បានទទួលចំណូល ១៣៩,៥លានដុល្លារនៅក្នុងសហរដ្ឋអាមេរិក និងកាណាដា។ ចំណូលនេះ គឺជាចំណូលដ៏ច្រើនបំផុតលំដាប់ទី៥ ក្នុងចំណោមខ្សែភាពយន្តតាំងពីដើមរៀងមក។
ក្រៅពីការរកបានយ៉ាងច្រើននៅអាមេរិក និងកាណាដានេះ នៅប្រទេសដទៃទៀត ក៏អាចក្ដោបក្ដាប់ចំណូលបានយ៉ាងសន្ធឹកសន្ធាប់ផងដែរ ពោលគឺចំនួន ១៤៤លានដុល្លារក្នុង ៥៤ប្រទេស។
បើគិតមើលចំណូលក្នុងការបញ្ចាំងសប្ដាហ៍ដំបូងនេះ គឺខ្សែភាពយន្តនេះបានចំណេញកប់ក្ដោងទៅហើយ ព្រោះតម្លៃនៃការផលិតរឿងនេះ គឺចំនួន ១០០លានដុល្លារ។
ខ្សែភាពយន្តដែលធ្លាប់រកបានច្រើនក្នុងឆ្នាំនេះដូចរឿងនេះដែរ គឺរឿង "Harry Potter and the Deathly Hallows - Part 2" ដែលធ្លាប់រកបាន ១៦៩លានដុល្លារ កាលពីខែកក្កដា។
គួរបញ្ជាក់ផងដែរថា រឿង "The Twilight Saga: Breaking Dawn: Part 1" គឺជាខ្សែភាពយន្តទីបួន ក្នុងស៊េរីរឿង Twilight ហើយក៏ជារឿងដែលរកបានច្រើនជាងគេក្នុងស៊េរីរឿងនេះផងដែរ លើស New Moon ដែលរកបាន ១៤២,៨លានដុល្លារកាលពីឆ្នាំ២០០៩។
អ្វីដែលគួរឲ្យចាប់អារម្មណ៍នោះ គឺថា៨០ភាគរយនៃអ្នកទិញសំបុត្រមើលរឿងនេះ គឺជាស្រ្ដី ខណៈដែលបុរសមានតែ២០ភាគរយប៉ុណ្ណោះ។
