ក្រុមអ្នកគាំទ្រលោក Steve Jobs ដែលជាសហស្ថាបនិករបស់ Appl នឹងមានឱកាសបានឃើញលោក Steve Jobs ម្ដងទៀត។ កិច្ចសម្ភាសន៍របស់លោក Steve Jobs ដែលមិនធ្លាប់ត្រូវបានគេបញ្ចេញកាលពីពេលមុនមកនោះ នឹងត្រូវគេបញ្ចាំងសម្រាប់សាធារណៈជនទូទៅក្នុងពេលឆាប់ៗនេះហើយ។ វីដេអូដែលមានចំណងជើងថា "Steve Jobs: The Lost Interview" នឹងត្រូវគេដាក់បញ្ចាំងនៅចុងខែនេះ។
កិច្ចសម្ភាសន៍ដែលមានរយៈពេល៧០នាទីនេះ ត្រូវបានថតទុកតាំងតែពីទសវត្សឆ្នាំ១៩៩០មកម្លេះ នៅពេលដែល Steve Jobs មិនទាន់វិលត្រលប់មកកាន់ Apple Inc នៅឡើយ។ គាត់នឹងសហស្ថាបនិក Apple ម្នាក់ទៀត គឺលោក Steve Wozniak បានចាប់ផ្ដើមបង្កើតក្រុមហ៊ុន Apple តាំងពីឆ្នាំ១៩៧៦ ប៉ុន្ដែលោក Steve Jobs បានចាកចេញពីក្រុមហ៊ុននេះនៅឆ្នាំ១៩៨៥។
ក្រោយពីចាកចេញ នៅឆ្នាំ១៩៩៧ គាត់បានវិលត្រលប់មកកាន់ក្រុមហ៊ុនដែលលោកបង្កើតមួយនេះវិញ ហើយបានជួយស្រោចស្រង់ Apple ដែលកំពុងជួបវិបត្តហិរញ្ញវត្ថុ។
កិច្ចសម្ភាសន៍រយៈពេល ១០នាទីផ្សេងទៀត ដែលបានដាក់បង្ហាញកាលពីឆ្នាំ១៩៩៥ ដែលមានចំណងជើងថា " Triumph of the Nerds" ប៉ុន្ដែវីដេអូនេះបានបាត់ស្រមោលរហូតទើបតែរកឃើញវិញកាលពីពេលថ្មីៗនេះ។
កិច្ចសម្ភាសន៍ដ៏សំខាន់ដែលមិនទាន់មានអ្នកណាម្នាក់ធ្លាប់បានមើលនេះ នឹងត្រូវចាប់ផ្ដើមបញ្ចាំងនៅថ្ងៃទី ១៦ ខែវិច្ឆិកាតទៅ នៅរោងភាពយន្តនៅ១៩ទីក្រុងផ្សេងគ្នាក្នុងសហរដ្ឋអាមេរិក។
ដូចដែលប្រិយមិត្តបានដឹងរួចមកហើយថា លោក Jobs បានស្លាប់កាលពីថ្ងៃទី ៥ តុលា ក្រោយពីកើតជំងឺមហារីកលំពែងដ៏រ៉ាំរ៉ៃ ក្នុងវ័យ៥៦ឆ្នាំ។
សង្ឃឹមថាខ្សែវីដេអូស្ដីពីលោក Steve Jobs នេះ នឹងត្រូវដាក់ឲ្យមើលតាមរយៈអនឡាញក្រោយពីការបញ្ចាំងតាមរោងភាពយន្តទៅចុះ ដើម្បីឲ្យអ្នកនៅស្រុកខ្មែរបានមើលនឹងគេ។ ក្រៅពីវីដេអូនេះ ខ្សែភាពយន្តដែលនិយាយពីជីវិតពិតរបស់បុរសដ៏ល្បីរូបនេះ ក៏នឹងត្រូវគេផលិតឡើងផងដែរនាពេលខាងមុខនេះ។
