ក្រោយពីស្ងាត់បាត់មុខពីឆាកតន្រ្ដីអស់រយៈពេលយូរគួរសម ប្រធានក្រុមចម្រៀង Big Bang ដ៏ល្បីល្បាញ គឺ G-Dragon បានបើកមាត់ហើបវាចារសារសព្ទពីរឿងអាស្រូវទាក់ទងនឹងថ្នាំញៀនរបស់គាត់ហើយនាពេលនេះ។
កាលពីថ្ងៃទី ២០ កុម្ភៈម្សិលម៉ិញនេះ ពោលគឺនៅក្នុងកម្មវិធី Healing Camp របស់ទូរទស្សន៍ SBS របស់កូរ៉េខាងត្បូង G-Dragon បាននិយាយថា នៅពេលមួយនោះ គាត់បានធ្វើតេសន៍ទឹកនោមរកសារធាតុញៀន ហើយនៅពេលដែលគាត់ទទួលលទ្ធផល គាត់រន្ធត់ជាខ្លាំង ហើយគិតថាលទ្ធផលនោះមិនត្រឹមត្រូវនោះទេ។ ដំបូងឡើយ គាត់មិនជឿនោះទេ ព្រោះគាត់មិនដែលប្រើប្រាស់ថ្នាំញៀន ប៉ុន្ដែបែរជាចេញលទ្ធផលថាគាត់មានសារធាតុញៀនក្នុងខ្លួនទៅវិញ។
តារាល្បីរូបនេះបានបន្ថែមទៀតថា ប្រាកដជាមានអ្វីមួយធ្វើឲ្យលទ្ធផលទៅជាបែបនេះ ដូច្នេះហើយគាត់បាននិយាយអំពីរឿងនេះក្នុងពេលស៊ើបអង្កេតរកការពិត។ ក្រោយពីការប្រគុំតន្រ្ដីនៅជប៉ុន (ខែឧសភា ២០១១) គឺមានការជប់លៀងមួយដ៏ធំ ដែលមានមនុស្សចូលរួមយ៉ាងច្រើន។ គាត់បានទទួលបារីមួយដើមពីជនមិនស្គាល់មុនម្នាក់នាពេលនោះ ដែលនេះហើយដែលគាត់គិតថា ជាប្រភពនៃបញ្ហា។
គាត់បានបកស្រាយរឿងទទួលបារីមកជក់ថា នៅពេលនោះ គាត់ និងអ្នកគ្រប់គ្រងរបស់គាត់ គឺសុទ្ធតែមានអារម្មណ៍រីករាយ ក្រោយពីការប្រគុំតន្រ្ដីដំណើរការយ៉ាងរលូន។ នៅពេលនោះ គាត់បានញ៉ាំស្រាយ៉ាងច្រើន ហើយនៅពេលដែលគាត់ចូលបន្ទប់ទឹក មានមនុស្សម្នាក់ជូនបារីដល់គាត់ ដែលគាត់បានទទួលវា ដោយគិតថា មិនសមប្រសិនបើគាត់បដិសេធមិនទទួល។
បន្ទាប់ពីបកស្រាយបានត្រឹមនេះ ពិធីករ Lee Kyung Kyu បានសួរបន្ថែមថា "ថ្នាំញៀនគឺខុសពីបារី តើហេតុអ្វីបានជា G-Dragon មិនដឹងថាវាខុសគ្នានាពេលនោះ?" G-Dragon បានឆ្លើយថា គាត់បានស្រវឹងស្រាជ្រុលទៅហើយ ហើយគាត់គ្រាន់តែដឹងថា បារីនោះខ្លាំងប៉ុណ្ណោះ ហើយគាត់ក៏មិនដែលដឹងថា ថ្នាំញឿនធុំក្លិនបែបណាដែរ ដូច្នេះគាត់ពិតជាមិនដឹងពីភាពខុសគ្នានោះទេ។
ជាចុងក្រោយ ពិធីករបានសួរថា "តើអ្នកកំពុងកុហកមែនទេ?" G-Dragon បានឆ្លើយថា អត់ទេ គាត់មិនកុហកទេ បើគាត់ពិតជាកុហកមែន គាត់មិនចេញមុខជាសាធារណៈបែបនេះទេ។
ចំពោះប្រិយមិត្តដែលគាំទ្រ G-Dragon វិញ គិតថាការបកស្រាយរបស់គាត់ សមហេតុផលដែរឬទេ?
