ក្រុមតារាចម្រៀងកូរ៉េខាងត្បូងដ៏ល្បីល្បាញបំផុត គឺក្រុម Girls' Generation បានជួបនឹងរឿងមិនល្អហើយនាពេលនេះ ពោលគឺមានរូបថតស្រាតរបស់ពួកគេតាមបណ្ដាញអ៊ីនធើណិត។
ផលិតកម្ម SM Entertainment ដែលជាទ្រនំរបស់ក្រុមចម្រៀងនារីដែលមានសមាជិក៩នាក់នេះ បានទាមទាររកការទទួលខុសត្រូវ ចំពោះការកែឆ្នៃរូបថតរបស់សមាជិកក្នុងដ៏ល្បីនេះ តាមរយៈកម្មវិធី photoshop។
គួរបញ្ជាក់ផងដែរថា យោងតាមប្រភពនៅក្នុងផលិតកម្មនេះ បានឲ្យដឹងថា រូបស្រាតរបស់សមាជិកក្រុម Girls' Generation ត្រូវបានរកឃើញនៅក្នុងគេហទំព័រមួយចំនួន កាលពីថ្ងៃទី ១៥ ខែកុម្ភៈកន្លងទៅ។ ឆ្លើយតបទៅនឹងហេតុការណ៍នេះ SM Entertainment បានស្នើសុំឲ្យប៉ូលីសធ្វើការស៊ើបអង្កេតជាបន្ទាន់លើបញ្ហានេះ។អ្នកតំណាងរបស់ SM Entertainment បានបញ្ជាក់ថា ផលិតកម្មនឹងដាក់ពាក្យបណ្ដឹងតាមផ្លូវច្បាប់ប្រឆាំងនឹងជនទាំងឡាយណាដែលបានបង្កើតរូបភាពឆ្កួតៗបែបនេះ។
គួររំលឹកផងដែរថា កាលពីឆ្នាំ ២០១០ ក៏មានរឿងហេតុបែបនេះកើតឡើងចំពោះ ក្រុមចម្រៀងនារីនេះផងដែរ។ ជាលទ្ធផលមនុស្សចំនួន ៩៧នាក់ ត្រូវបានចាប់ខ្លួន ដោយសាររកឃើញថាជាអ្នកចូលរួមធ្វើ និងចែកចាយរូបនោះ។
ប្រិយមិត្តប្រហែលជាដឹងហើយថា តារាល្បី គឺជាមុខសញ្ញានៃក្រុមជនខិលខូចដែលមានចំណេះដឹង តែមិនយកចំណេះដឹងទៅបម្រើសង្គម បែរជាយកមកបង្ខូចគេឈ្មោះរបស់គេ។ តារាខ្មែរខ្លះ ក៏ត្រូវបានក្លាយជាជនរងគ្រោះ នៃអំពើមិនគប្បីនេះផងដែរ។
