ប្រិយមិត្តដែលចូលចិត្តបទចម្រៀងកូរ៉េ ប្រហែលជាខានបានស្ដាប់បទថ្មីរបស់ក្រុមចម្រៀង miss A យូរណាស់ហើយ ដោយសារតែក្រុមនេះខានចេញអាល់ប៊ុមថ្មីអស់រយៈពេលជាយូរ។ ប៉ុន្ដែកាលពីពេលថ្មីៗនេះ ក្រុមចម្រៀងនារីដ៏ល្បីមួយនេះ បានចេញនូវសេចក្ដីប្រកាសព័ត៌មាន តាមរយៈវែបសាយផ្ទាល់ខ្លួនទាក់ទងនឹងការចេញអាល់ប៊ុមថ្មីរបស់ពួកគេ។
ទន្ទឹមនឹងគ្នានេះដែរ ក្រុមចម្រៀង miss A បានរៀបចំការប្រកួតប្រជែងសម្រាប់ក្រុមអ្នកគាំទ្រផងដែរ ដើម្បីទទួលសំបុត្រចូលទស្សនាការថតវីដេអូបទចម្រៀងរបស់ពួកគេ។ អ្នកគាំទ្រណា ដែលមានសំណាង បានចូលរួមក្នុងការថតនោះ នៅថ្ងៃទី៤ ខែកុម្ភៈកន្លងទៅ។ ដោយសារតែបែបនេះហើយ យើងអាចសន្និដ្ឋានបានថា អាល់ប៊ុមថ្មីដែលគេទន្ទឹងរង់ចាំជាយូរមកហើយនោះ ប្រហែលជាចេញក្នុងខែនេះហើយ ក្រោយពីការថតជាវីដេអូរួចរាល់។
ផលិតកម្ម AQ Entertainment ដែលជាទ្រនំតាំងពីដំបូងនៃក្រុម miss A បានបញ្ជាក់ថា ទោះបីជាខាងផលិតកម្មមិនបានអញ្ជើញអ្នកគាំទ្រទាំងអស់ក៏ដោយ ប៉ុន្ដែការធ្វើបែបនេះ ក៏ជាការចូលរួមមួយពីក្រុមអ្នកគាំទ្របានខ្លះផងដែរ នៅក្នុងដំណើរការនៃការផលិតអាល់ប៊ុមថ្មីរបស់ miss A។AQ Entertainment បានបន្តទៀតថា សមាជិកម្នាក់ៗរបស់ miss A បាននិងកំពុងតែមមាញឹកយ៉ាងខ្លាំង ដោយសារតែពួកគេប្រឹងប្រែងទាំងយប់ទាំងថ្ងៃ ដើម្បីអាល់ប៊ុមថ្មីរបស់ពួកគេ។
ចង់ដឹងថាអាល់ប៊ុមថ្មីរបស់ miss A មានចំណងជើងអ្វី និងចេញនៅពេលណា សូមកុំភ្លេចតាមដានព័ត៌មានសិល្បៈកំសាន្តរបស់ខ្មែរសារិកាឲ្យបានរាល់ថ្ងៃណា!
ប្រភព៖ Allkpop
